ರೈಲು ಪ್ರಯಾಣಿಕರ ಪ್ರಯಾಣದ ಅನುಭವವನ್ನು ಮತ್ತಷ್ಟು ಸುಲಭಗೊಳಿಸಲು ಭಾರತೀಯ ರೈಲ್ವೆ ಇಲಾಖೆ ನಾಳೆಯಿಂದ (ಜುಲೈ 31) ನೂತನ ಆನ್ಲೈನ್ ಲಗೇಜ್ ಬುಕಿಂಗ್ ಸೇವೆಯನ್ನು ಪ್ರಾರಂಭಿಸುತ್ತಿದೆ.
ಉಚಿತ ಮಿತಿಗಿಂತ ಹೆಚ್ಚು ಲಗೇಜ್ ಒಯ್ಯುವ ಪ್ರಯಾಣಿಕರು ಇನ್ಮುಂದೆ ರೈಲ್ವೆ ನಿಲ್ದಾಣದ ಲಗೇಜ್ ಬುಕಿಂಗ್ ಕೌಂಟರ್ಗಳಲ್ಲಿ ಗಂಟೆಗಟ್ಟಲೆ ಸಾಲಿನಲ್ಲಿ ನಿಲ್ಲುವ ಅಗತ್ಯ ಇರುವುದಿಲ್ಲ. ಪ್ರಯಾಣಕ್ಕೂ ಮೊದಲೇ ಹೆಚ್ಚುವರಿ ಲಗೇಜ್ ಅನ್ನು ಆನ್ಲೈನ್ನಲ್ಲಿ ಬುಕ್ ಮಾಡುವುದರಿಂದ, ಪ್ರಯಾಣದ ವೇಳೆ ಟಿಕೆಟ್ ತಪಾಸಕರು (TTE) ವಿಧಿಸುವ ಭಾರಿ ದಂಡದಿಂದ ಪ್ರಯಾಣಿಕರು ಪಾರಾಗಬಹುದು.
ಹೊಸ ಆನ್ಲೈನ್ ಹೆಚ್ಚುವರಿ ಲಗೇಜ್ ಬುಕಿಂಗ್ ಸೌಲಭ್ಯವು ಅನಗತ್ಯ ಪೇಪರ್ ಕೆಲಸ ಹಾಗೂ ಕಾಯುವ ಸಮಯವನ್ನು ಕಡಿಮೆ ಮಾಡುವ ಮತ್ತು ದೇಶಾದ್ಯಂತ ರೈಲ್ವೆ ಟರ್ಮಿನಲ್ಗಳಲ್ಲಿ ಉಂಟಾಗುವ ಜನಸಂದಣಿಯನ್ನು ನಿಯಂತ್ರಿಸುವ ಗುರಿಯನ್ನು ಹೊಂದಿದೆ.
ಉಚಿತ ಲಗೇಜ್ ಮಿತಿ ವಿವರ:
ಎಸಿ ಫಸ್ಟ್ ಕ್ಲಾಸ್ – ಉಚಿತ ಮಿತಿ: 70 ಕೆಜಿ; ಗರಿಷ್ಠ ಬುಕಿಂಗ್ ಮಿತಿ: 150 ಕೆಜಿ
ಫಸ್ಟ್ ಕ್ಲಾಸ್ ಮತ್ತು ಎಸಿ 2-ಟೈಯರ್ – ಉಚಿತ ಮಿತಿ: 50 ಕೆಜಿ; ಗರಿಷ್ಠ ಬುಕಿಂಗ್ ಮಿತಿ: 100 ಕೆಜಿ
ಎಸಿ 3-ಟೈಯರ್ – ಎಸಿ 3 ಇಕಾನಮಿ ಮತ್ತು ಎಸಿ ಚೇರ್ ಕಾರ್; ಉಚಿತ ಮಿತಿ: 40 ಕೆಜಿ
ಸ್ಲೀಪರ್ ಕ್ಲಾಸ್ – ಉಚಿತ ಮಿತಿ: 40 ಕೆಜಿ; ಗರಿಷ್ಠ ಬುಕಿಂಗ್ ಮಿತಿ: 80 ಕೆಜಿ
ಸೆಕೆಂಡ್ ಕ್ಲಾಸ್ / ಜನರಲ್ – ಉಚಿತ ಮಿತಿ: 35 ಕೆಜಿ; ಗರಿಷ್ಠ ಬುಕಿಂಗ್ ಮಿತಿ: 70 ಕೆಜಿ
ಪ್ರಯಾಣಕ್ಕೂ ಮುನ್ನ ಹೆಚ್ಚುವರಿ ಲಗೇಜ್ ಅನ್ನು ಆನ್ಲೈನ್ನಲ್ಲೇ ಕಾಯ್ದಿರಿಸುವ ಪ್ರಯಾಣಿಕರು, ತಮ್ಮ ಲಗೇಜ್ಗೆ ಬೀಳುವ ದಂಡದಿಂದ ಮುಕ್ತಿ ಪಡೆಯಬಹುದು ಎಂದು ರೈಲ್ವೆ ಅಧಿಕಾರಿಗಳು ತಿಳಿಸಿದ್ದಾರೆ.
