ಭೂಗತಪಾತಕಿ ದಾವೂದ್ ಇಬ್ರಾಹಿಂನ ಸಹಚರರು ಮಧ್ಯಪ್ರದೇಶದ ಭೋಪಾಲ್ ಹೊರವಲಯದಲ್ಲಿ ರಹಸ್ಯವಾಗಿ ನಡೆಸುತ್ತಿದ್ದ ಮಾದಕವಸ್ತು ತಯಾರಿಕಾ ಕೇಂದ್ರವೊಂದನ್ನು ಇತ್ತೀಚೆಗೆ ಭೇದಿಸಲಾಗಿದೆ.
ಕಳೆದ 7 ವರ್ಷಗಳಿಂದ ನಿರ್ಜನವಾಗಿದೆ ಎನ್ನಲಾದ ಮನೆಯೊಂದಕ್ಕೆ ವಿದ್ಯುತ್ ಮೀಟರ್ ಅನ್ನು ಕೆಲವೇ ಗಂಟೆಗಳಲ್ಲಿ ಅನುಮೋದಿಸಿ, ಅಳವಡಿಸಲಾಗಿತ್ತು. ನಿರ್ಜನ ಮನೆಗೆ ಮಿಂಚಿನ ವೇಗದಲ್ಲಿ ಮೀಟರ್ ಅಳವಡಿಸಿದ್ದು, ಕಂದಾಯ ಗುಪ್ತಚರ ನಿರ್ದೇಶನಾಲಯ(ಡಿಆರ್ಐ)ದ ಅನುಮಾನಕ್ಕೆ ಕಾರಣವಾಗಿತ್ತು.
ಹೀಗಾಗಿ ಆ.16ರಂದು ಈ ಮನೆಗೆ ಡಿಆರ್ಐ ಅಧಿಕಾರಿಗಳು ದಾಳಿ ನಡೆಸಿದ್ದರು.ದಾಳಿಯ ವೇಳೆ ಇದು ಕೇವಲ ಮನೆಯಲ್ಲ, ಬದಲಾಗಿ ಡ್ರಗ್ಸ್ ಕಾರ್ಖಾನೆ ಎಂದು ಬಯಲಾಗಿತ್ತು. ಮಿಯಾವ್-ಮಿಯಾವ್ ಎಂದು ಕರೆಯಲಾಗುವ 92 ಕೋಟಿ ರೂ. ಮೌಲ್ಯದ 61.20 ಕೇಜಿ ಮೆಫೆಡೋನ್ ಹಾಗೂ 541 ಕೇಜಿ ತೂಕದ ಇನ್ನಿತರೆ ರಾಸಾಯನಿಕಗಳನ್ನು ವಶಪಡಿಸಿಕೊಳ್ಳಲಾಯಿತು.
ದಾವೂದ್ ಬಂಟ, ಟರ್ಕಿಯಲ್ಲಿ ಅಡಗಿರುವ ಸಲೀಮ್ ಧೋಲಾ ಈ ದಂಧೆಯ ರೂವಾರಿ ಎನ್ನಲಾಗಿದೆ. ಫಾರ್ಮಸಿ ಪದವೀಧರರು ಸೇರಿದಂತೆ ಅನೇಕ ಸ್ಥಳೀಯರು ಈ ಕಾರ್ಖಾನೆಯಲ್ಲಿ ದುಡಿಯುತ್ತಿದ್ದರು ಎಂದು ತಿಳಿದುಬಂದಿದೆ.
