ಸುಂಕ ಸಮರ ಸಾರಿದ್ದ ಅಮೆರಿಕ, ಭಾರತ ಪರವಾಗಿ ಕೈಗೊಂಡ ಈ ಕ್ರಮದಿಂದ ಕೊಂಚ ರಿಲೀಫ್!

ಭಾರತ –ಅಮೆರಿಕ ನಡುವೆ ಸುಂಕ ಸಮರ ನಡೆಯುತ್ತಿದ್ದರೆ, ಇದೀಗ ಅಮೆರಿಕ ಕೊಂಚ ಮೆತ್ತಗಾದಂತಿದೆ.

ಎಚ್-1ಬಿ ಸ್ಥಾನಮಾನಕ್ಕಾಗಿ ಪ್ರಾಯೋಜಕತ್ವ ಪಡೆದ ಇತ್ತೀಚಿನ ಅಂತಾರಾಷ್ಟ್ರೀಯ ಪದವೀಧರರು ಈಗಾಗಲೇ ದೇಶ(ಅಮೆರಿಕ)ದಲ್ಲಿದ್ದರೆ 1 ಲಕ್ಷ ಡಾಲರ್‌ ಶುಲ್ಕ ಪಾವತಿಸುವ ಅಗತ್ಯವಿಲ್ಲ ಎಂದು ಟ್ರಂಪ್ ಆಡಳಿತ ಸ್ಪಷ್ಟನೆ ನೀಡಿದ್ದು ಇದರಿಂದ ಅಮೆರಿಕದಲ್ಲಿರುವ ಸಾವಿರಾರು ಭಾರತೀಯ ವೃತ್ತಿಪರರಿಗೆ ಮತ್ತು ವಿದ್ಯಾರ್ಥಿಗಳಿಗೆ ‘ರಿಲೀಫ್’ ಸಿಕ್ಕಿದಂತಾಗಿದೆ.

ಅಸ್ತಿತ್ವದಲ್ಲಿರುವ ಎಚ್-1ಬಿ ವೀಸಾ ಹೊಂದಿರುವವರು ಕಳೆದ ತಿಂಗಳು ಘೋಷಿಸಲಾದ 1 ಲಕ್ಷ ಡಾಲರ್ ಶುಲ್ಕ ಪಾವತಿಸಬೇಕಿಲ್ಲ ಎಂದು ಅಧಿಕಾರಿಗಳು ಈ ಹಿಂದೆಯೇ ಹೇಳಿದ್ದರು.

ಕಾನೂನುಬದ್ಧ ವೀಸಾದೊಂದಿಗೆ ಈಗಾಗಲೇ ಅಮೆರಿಕಾದಲ್ಲಿ ಇರುವವರು, ಎಫ್-1 ಸೂಡೆಂಟ್ ವೀಸಾ ಹೊಂದಿರುವವರು, ಎಲ್-1 ಅಂತರ್ ಕಂಪೆನಿ ವರ್ಗಾವಣೆಯಡಿ ಬಂದವರು ಹಾಗೂ ಪ್ರಸ್ತುತ ಹೊಂದಿರುವ ಎಚ್-1ಬಿ ವೀಸಾದ ನವೀಕರಣ ಅಥವಾ ವಿಸ್ತರಣೆ ಬಯಸುವವರು 1 ಲಕ್ಷ ಡಾಲರ್ (ಸುಮಾರು 90 ಲಕ್ಷ ರೂ.) ಪಾವತಿಸುವ ಅಗತ್ಯವಿಲ್ಲ ಎಂದು ಅಮೆರಿಕದ ಪೌರತ್ವ ಮತ್ತು ವಲಸೆ ಸೇವಾ ಇಲಾಖೆ ಹೇಳಿದೆ.