ಪುತ್ತೂರು : ಶ್ರೀ ಪತಂಜಲಿ ಯೋಗ ಶಿಕ್ಷಣ ಸಮಿತಿ ಕರ್ನಾಟಕ ಇದರ ನೇತ್ರಾವತಿ ವಲಯ, ಪುತ್ತೂರು ತಾಲೂಕು ವತಿಯಿಂದ ಇತಿಹಾಸ ಪ್ರಸಿದ್ಧ ಶ್ರೀ ಭಟ್ಟಿ ವಿನಾಯಕ ದೇವಸ್ಥಾನ ಬಲ್ನಾಡುವಿನಲ್ಲಿ ಗಣೇಶ ಚತುರ್ಥಿ ಪ್ರಯುಕ್ತ 4ನೇ ವರುಷದ ಸಾಮೂಹಿಕ ಯೋಗ ಗಣಪತಿ ನಮಸ್ಕಾರ ಆಗಸ್ಟ್‌ 27ರಂದು ಪೂರ್ವಾಹ್ನ 4.50ರಿಂದ 7.00ರ ತನಕ ನಡೆಯಿತು.
ಕಾರ್ಯಕ್ರಮದ ಉದ್ಘಾಟನೆಯನ್ನು ಶ್ರೀ ಭಟ್ಟಿ ವಿನಾಯಕ ದೇವಸ್ಥಾನದ ಆಡಳಿತ ಮಂಡಳಿಯ ಅಧ್ಯಕ್ಷರಾದ ಮಾಧವ ಗೌಡ ಕಾಂತಿಲ ನೆರವೇರಿಸಿ ಸಮಿತಿಯ ಶಿಸ್ತು, ಸಂಘಟನೆ, ಸಂಸ್ಕಾರಗಳ ಬಗ್ಗೆ ಪ್ರಶಂಸಿಸಿ, ಶುಭಹಾರೈಸಿದರು.
ಈ ಸಂದರ್ಭದಲ್ಲಿ ಜಿಲ್ಲಾ ಸಹಸಂಚಾಲಕರಾದ ಯೋಗೀಶ ಆಚಾರ್ಯ, ತಾಲೂಕು ಸಂಚಾಲಕರಾದ ಕೃಷ್ಣಾನಂದ ಹಾಗೂ ಬಲ್ನಾಡು ಶಾಖೆಯ ಯೋಗಬಂಧುಗಳು ಉಪಸ್ಥಿತರಿದ್ದರು.
ಬಳಿಕ ಯೋಗ ಸಮಿತಿಯ ಪಠ್ಯಕ್ರಮದಂತೆ ಭಜನೆ, ಅಮೃತವಚನ, ಪಂಚಾಂಗ ಪಠಣ, ಮಾನಸಿಕ ಸಿದ್ಧತೆ, ಉಸಿರಾಟ ಕ್ರಿಯೆಗಳ ಬಳಿಕ 21 ಬಾರಿ ಮಂತ್ರಸಹಿತ ಸಾಮೂಹಿಕ ಯೋಗ ಗಣಪತಿ ನಮಸ್ಕಾರ ಮಾಡಲಾಯಿತು.
ಬಲ್ನಾಡು ಶ್ರೀ ಉಳ್ಳಾಲ್ತಿಯ ದೇವಿಯ ಕ್ಷೇತ್ರವಾದ ಕಾರಣ ವಿಶೇಷ ಸಾಮೂಹಿಕ ಯೋಗ ದುರ್ಗಾ ನಮಸ್ಕಾರವನ್ನೂ ಮಾಡಿದ ಬಳಿಕ 3 ಬಾರಿ ಸೂರ್ಯ ನಮಸ್ಕಾರ ಮಾಡಲಾಯಿತು.
ತಾರಾನಾಥ ಅವರು ಗಣೇಶ ಚತುರ್ಥಿಯ ವಿಶೇಷತೆ ಬಗ್ಗೆ ಬೌದ್ಧಿಕ ನೀಡಿದರು. ತದನಂತರ ಅನ್ನಪೂರ್ಣ ಮಂತ್ರದೊಂದಿಗೆ ಗಣೇಶ ಚತುರ್ಥಿಯ ವಿಶೇಷ ಪ್ರಸಾದ ನೀಡಲಾಯಿತು. 200ಕ್ಕೂ ಮಿಕ್ಕಿ ಯೋಗ ಬಂಧುಗಳು ಭಾಗವಹಿಸಿದ್ದರು.
ಅಗ್ನಿಹೋತ್ರವನ್ನು ಬಲ್ನಾಡಿನ ಬಾಲಕೃಷ್ಣ ದಂಪತಿಗಳು ನೆರವೇರಿಸಿದರು. ಹೇಮಲತಾ ಕಾರ್ಯಕ್ರಮ ನಿರೂಪಿಸಿದರು, ಚೈತ್ರಿಕಾ ನಾಗೇಶ್‌ ಶಿಕ್ಷಣ ವಿಧಿ ನೆರವೇರಿಸಿದರು. ಕಾರ್ಯಕ್ರಮ ಸಂಚಾಲಕಿ ವಿನಯ ಪೈ ವಂದಿಸಿದರು. ತುಕಾರಾಮ ಮಾರ್ಗದರ್ಶನ ನೀಡಿದರು.
