ಪುತ್ತೂರು: ಸಂಚಾರ ನಿಯಮ ಉಲ್ಲಂಘಿಸಿದ್ದೀರಿ ಎಂಬ ಬರಹ ಹೊತ್ತ ಸಂದೇಶ ನಿಮ್ಮ ವಾಟ್ಸ್’ಆ್ಯಪ್’ಗೆ ಬಂದರೆ ತಲೆಕೆಡಿಸಿಕೊಳ್ಳಬೇಡಿ. ಯಾಕೆಂದರೆ ಇದು ವಂಚನೆಗೆ ಹಾಕಿರುವ ಹೊಂಚು.
ಪುತ್ತೂರಿನ ಉದ್ಯಮಿಯೋರ್ವರಿಗೆ ಇಂತಹ ಸಂದೇಶ ವಾಟ್ಸ್’ಆ್ಯಪ್’ಗೆ ಬಂದು ಬಿದ್ದಿದೆ. ಏನಿದು ಎಂದು ಸಂದೇಶ ಓದುತ್ತಿರಬೇಕಾದರೆ, APK ಫೈಲ್ ಕೂಡ ಆಗಮಿಸಿತು. ಅಷ್ಟರಲ್ಲೇ ತಿಳಿಯಿತು ಇದು ಮೋಸದ ಜಾಲ ಎಂದು.
ನಂಬರನ್ನು M Parivahan ಎಂದು ಸೇವ್ ಮಾಡಿಕೊಂಡು ವಾಟ್ಸ್’ಆ್ಯಪ್ ಸಂದೇಶ ರವಾನಿಸಲಾಗಿದೆ. ಪರಿವಾಹನ್ ಎನ್ನುವುದು ಆರ್.ಟಿ.ಓ. ಇಲಾಖೆಯ ತಂತ್ರಾಂಶ. ಇದರ ಜೊತೆ APK ಫೈಲ್ ಇರುವುದು ಸಂದೇಹಕ್ಕೆ ಎಡೆ ನೀಡಿತು. ಇದರ ಬಗ್ಗೆ ಆರ್.ಟಿ.ಓ. ಹಾಗೂ ಸಂಚಾರ ಪೊಲೀಸ್ ಠಾಣೆಯಲ್ಲಿ ವಿಚಾರಿಸುವಾಗ, ವಂಚನೆ ಎನ್ನುವುದು ಸ್ಪಷ್ಟವಾಯಿತು.
ವಾಟ್ಸ್’ಆ್ಯಪ್ ಸಂದೇಶ ಕಳುಹಿಸುವುದಿಲ್ಲ:
ಒಂದು ವೇಳೆ ನೀವು ಸಂಚಾರಿ ನಿಯಮ ಉಲ್ಲಂಘಿಸಿದರೂ ವಾಟ್ಸ್’ಆ್ಯಪ್ ಸಂದೇಶ ಬರುವುದಿಲ್ಲ. ಬದಲಾಗಿ ಎಸ್.ಎಂ.ಎಸ್. ಕಳುಹಿಸಲಾಗುತ್ತದೆ. ಅಲ್ಲದೇ, APK ಫೈಲ್ ಕಳುಹಿಸುವ ಯಾವುದೇ ಸಂದೇಶ ಆಗಲಿ ಫೈಲ್ ಗಳನ್ನಾಗಲಿ ತೆರೆಯಲು ಹೋಗಲೇಬೇಡಿ. ಇದು ವಂಚನೆಯ ಜಾಲ ಎನ್ನುತ್ತಾರೆ ಪುತ್ತೂರು ಆರ್.ಟಿ.ಓ. ವಿಶ್ವನಾಥ ಅಜಿಲ ಅವರು.
