ಪುತ್ತೂರು:ಇತಿಹಾಸ ಪ್ರಸಿದ್ಧ ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನದ ರಾಜಾಂಗಣದಲ್ಲಿನ ಕಟ್ಟೆಗಳ ಜೀರ್ಣೋದ್ಧಾರ ಕಾರ್ಯಾಚರಣೆ ವೇಳೆ ಮಹತ್ವದ ಇತಿಹಾಸದ ಸಾಕ್ಷ್ಯ ಬೆಳಕಿಗೆ ಬಂದಿದೆ. ಕಂಡನಾಯಕನ ಕಟ್ಟೆಯನ್ನು ತೆರವುಗೊಳಿಸುವ ಸಂದರ್ಭದಲ್ಲಿ ದೇವರು ಆಸೀನರಾಗುವ ಪೀಠದಲ್ಲಿ 1908ನೇ ಇಸವಿಯ ತಾಮ್ರದ ಶಾಸನ ಪತ್ತೆಯಾಗಿದೆ.
ದೇವಸ್ಥಾನದ ಅಭಿವೃದ್ಧಿ ಮತ್ತು ಜೀರ್ಣೋದ್ಧಾರದ ಭಾಗವಾಗಿ ರಾಜಾಂಗಣದಲ್ಲಿದ್ದ ನಾಲ್ಕು ಕಟ್ಟೆಗಳು ಹಾಗೂ ಕೆರೆಯ ಎದುರಿನ ಕಟ್ಟೆಯನ್ನು ಈಗಾಗಲೇ ತೆರವು ಮಾಡಲಾಗಿದೆ. ಈ ವೇಳೆ ಪತ್ತೆಯಾದ ತಾಮ್ರದ ಶಾಸನವನ್ನು ಶುಚಿಗೊಳಿಸಿ ಪರಿಶೀಲಿಸಿದಾಗ, 1908ರ ಏಪ್ರಿಲ್ ತಿಂಗಳಲ್ಲಿ ಈ ಕಟ್ಟೆಯನ್ನು ನಿರ್ಮಿಸಿರುವುದಾಗಿ ಉಲ್ಲೇಖಿಸಲಾಗಿದೆ.
ಉತ್ಸವ ಸಂಪ್ರದಾಯದ ಐತಿಹಾಸಿಕ ಸಾಕ್ಷ್ಯ
ಉತ್ಸವಗಳ ಸಂದರ್ಭದಲ್ಲಿ ಶ್ರೀ ದೇವರು ರಾಜಾಂಗಣದಲ್ಲಿ ಕಂಡನಾಯಕನ ಕಟ್ಟೆಯಲ್ಲಿ ಆಸೀನರಾಗಿ ಪೂಜೆ ಸ್ವೀಕರಿಸಿ ಬಳಿಕ ಸವಾರಿ ಅಥವಾ ಇತರ ಉತ್ಸವಗಳಿಗೆ ತೆರಳುವುದು ಸಂಪ್ರದಾಯವಾಗಿದೆ. ವಿಶೇಷ ದಿನಗಳಲ್ಲಿ ಚಂದ್ರಮಂಡಲ ರಥ ಹಾಗೂ ಕೆರೆ ಉತ್ಸವಕ್ಕೂ ಇದೇ ಕಟ್ಟೆಯಿಂದ ದೇವರ ಸವಾರಿ ಆರಂಭವಾಗುತ್ತಿತ್ತು.ಈ ಹಿನ್ನೆಲೆಯಲ್ಲಿ ಕಟ್ಟೆಯೊಳಗೆ ಪತ್ತೆಯಾದ ತಾಮ್ರ ಶಾಸನವು ದೇವಸ್ಥಾನದ ಐತಿಹಾಸಿಕ ಪರಂಪರೆಯ ಮಹತ್ವವನ್ನು ಮತ್ತಷ್ಟು ದೃಢಪಡಿಸಿದೆ.
ಇತಿಹಾಸದ ಕುರುಹುಗಳು
ಪತ್ತೆಯಾದ ತಾಮ್ರದ ಶಾಸನವನ್ನು ಪ್ರತ್ಯೇಕವಾಗಿ ಸಂರಕ್ಷಿಸಲಾಗಿದೆ.ದೇವಸ್ಥಾನದ ರಾಜಾಂಗಣದಲ್ಲಿರುವ ಪ್ರತಿಯೊಂದು ಕಟ್ಟೆಗೂ ವಿಶಿಷ್ಟ ಇತಿಹಾಸವಿದೆ ಎಂಬುದು ಈ ಘಟನೆಯಿಂದ ಮತ್ತೊಮ್ಮೆ ಸ್ಪಷ್ಟವಾಗಿದೆ.ಗಮನಾರ್ಹವಾಗಿ, 2013ರಲ್ಲಿ ನಡೆದ ಜೀರ್ಣೋದ್ಧಾರ ಸಂದರ್ಭದಲ್ಲೂ ಹಲವು ಐತಿಹಾಸಿಕ ಕುರುಹುಗಳು ಪತ್ತೆಯಾಗಿದ್ದವು ಎಂಬುದು ಇಲ್ಲಿ ಸ್ಮರಣೀಯ.
