ಜನಾರ್ದನ ಪೂಜಾರಿಗೆ ಮತ ಹಾಕಿದವರೇ ದಫನ ಭೂಮಿಯಲ್ಲಿರುವುದು; ಪೂಜಾರಿ ಮರೆತಿರಬಹುದು: ಅಶ್ರಫ್ ಕಲ್ಲೇಗ

ಪುತ್ತೂರು: ಒಂದೊಮ್ಮೆ ವೀರೇಂದ್ರ ಹೆಗ್ಗಡೆ ಅವರನ್ನು ಅವಮಾನಿಸಿದ್ದ ಜನಾರ್ದನ ಪೂಜಾರಿ ಅವರಿಗೆ ಇಂದು ಧರ್ಮಸ್ಥಳದ ಬಗ್ಗೆ ಅಭಿಮಾನ ಹೆಚ್ಚಾಗಿದೆ. ಇದರ ಭರದಲ್ಲಿ, ಮಸೀದಿಯಲ್ಲಿ ಮೃತದೇಹ ದಫನ ಮಾಡುವುದಿಲ್ಲವೇ ಎಂದು ಪ್ರಶ್ನಿಸಿದ್ದಾರೆ ಎಂದು ದ.ಕ. ಯುವಜನ ಮುಸ್ಲಿಂ ಒಕ್ಕೂಟದ ಅಧ್ಯಕ್ಷ ಅಶ್ರಫ್ ಕಲ್ಲೇಗ ಹೇಳಿದರು.

ಮಂಗಳವಾರ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಅವರು, ವಾಸ್ತವದಲ್ಲಿ ಮಸೀದಿಯಲ್ಲಿ ದಫನ ಮಾಡುವುದಿಲ್ಲ. ಅದೇನೇ ಇದ್ದರೂ ಖಬರಸ್ಥಾನದಲ್ಲಿ ದಫನಗೊಂಡಿರುವವರೆಲ್ಲರೂ ಜನಾರ್ದನ ಪೂಜಾರಿ ಅವರಿಗೆ ಅಂದು ಮತ ಹಾಕಿದ್ದಾರೆ. ಜನಾರ್ದನ ಪೂಜಾರಿ ಅವರು ಅದನ್ನು ಮರೆತಿರಬಹುದು ಎಂದರು.

ಧರ್ಮಸ್ಥಳವನ್ನು ಮುಜರಾಯಿ ಇಲಾಖೆಗೆ ಸೇರಿಸಬೇಕು ಎಂದು ಮೊದಲು ಹೇಳಿಕೆ ನೀಡಿದವರೇ ಪೂಜಾರಿ. ಇಂದು ಧರ್ಮಸ್ಥಳದ ಬಗ್ಗೆ ಅಭಿಮಾನ ಉಕ್ಕಿ ಹರಿಯುತ್ತಿದೆ. ಧರ್ಮಸ್ಥಳದ ಪಕ್ಕದಲ್ಲಿ ಕನ್ಯಾಡಿ ಕ್ಷೇತ್ರ ನಿರ್ಮಾಣಕ್ಕೂ ಇವರೇ ಕಾರಣರು. ಮೊದಲು ಹೆಗ್ಗಡೆ ಅವರನ್ನು ಅವಮಾನಿಸಿದ್ದು ಇದೇ ಪೂಜಾರಿ ಎಂದರು.

ವೀರೇಂದ್ರ ಹೆಗ್ಗಡೆ ಅವರ ಬಗ್ಗೆ ನಮಗೆ ಗೌರವ ಇದೆ. ಅವರ ಬಗ್ಗೆ ನಾವೆಲ್ಲೂ ಹೇಳಿಕೆ ನೀಡಿಲ್ಲ. ಅವರ ಹಿಂದೆ ನಡೆಯುತ್ತಿರುವ ಹುನ್ನಾರವನ್ನು ಹೆಗ್ಗಡೆ ಅವರು ಅರ್ಥ ಮಾಡಿಕೊಳ್ಳಬೇಕು. ಮುಸ್ಲಿಮರು ಕ್ಷೇತ್ರದ ಬಗ್ಗೆ ಎಲ್ಲೂ ಮಾತನಾಡಿಲ್ಲ. ವೃಥಾ ಅವರ ಹೆಸರನ್ನು ಎಳೆದು ತರಲಾಗುತ್ತಿದೆ. ಇದು ಪ್ರಕರಣವನ್ನು ತಿರುಚುವ ಪ್ರಯತ್ನ ಎಂದರು.

ಬಸನಗೌಡ ಪಾಟೀಲ್ ಯತ್ನಾಳ್ ಅವರು ಹೇಳಿಕೆ ನೀಡಿ, ಹಿಂದೂ ಯುವಕರು ಮುಸ್ಲಿಂ ಯುವತಿಯರನ್ನು ಮದುವೆಯಾದರೆ 5 ಲಕ್ಷ ರೂ. ನೀಡುವುದಾಗಿ ಘೋಷಿಸಿದ್ದಾರೆ. ಮುಸ್ಲಿಂ ಯುವತಿಯರಿಗೆ ಮದುವೆ ಮಾಡಲು ಮುಸ್ಲಿಂ ಸಮಿತಿಗಳಿವೆ, ಮಸೀದಿಗಳಿವೆ. ಯತ್ನಾಳ್ ಅವರು, ಹಿಂದೂಗಳಲ್ಲಿ ಮದುವೆ ಆಗದೇ ಬಾಕಿ ಉಳಿದಿರುವ ಯುವತಿಯರಿಗೆ ಮದುವೆ ಮಾಡಿಸಲಿ. ಬಿಜೆಪಿ ಮುಖಂಡನ ಪುತ್ರ ಅತ್ಯಾಚಾರ ಮಾಡಿ ಕೈಕೊಟ್ಟಿದ್ದು, ಆ ಹುಡುಗನಿಗೂ ಹುಡುಗಿಗೂ ಮದುವೆ ಮಾಡಿಸಲಿ. ದೂರವೇ ಉಳಿದಿರುವ ನರೇಂದ್ರ ಮೋದಿ ಹಾಗೂ ಅವರ ಪತ್ನಿಯನ್ನು ಒಂದು ಮಾಡಲಿ ಎಂದು ತಿರುಗೇಟು ನೀಡಿದರು.

ಪತ್ರಿಕಾಗೋಷ್ಠಿಯಲ್ಲಿ ಸಮಿತಿ ಅಶ್ರಫ್, ಬಶೀರ್ ಪರ್ಲಡ್ಕ, ಹಂಝ ಕಬಕ, ನೌಶದ್ ಬೊಳುವಾರು ಉಪಸ್ಥಿತಿ ಇದ್ದರು.